Demokrasi Ngelaban Pengawa Ngelakar Bepilihbesai Di Sarawak!

Dipetik Dari Sarawak report :

Mayuh orang ti megai perintah chara dictator ti pemadu jai di dunya tu endang seruran ngaku pemenang sida endang amat-amat menang ditentuka nengah peti undi, ngambika sida ulih ngumbai diri endang orang ti dipilh rayat sida ti ‘rindu sereta sayauka’ sida.
Tang ke bendar, penemu nya semina bula sereta nipu.
 
Abdul Taib Mahmud nya siku ari raban dictator ti jai nya lalu orang ti kena kelakar iya nya endang iya empu.
Pengawa nipu maya bepilihbesai ti dipejalaika Taib nya diatu nyau nyadika sebengkah ensera tauka cherita lama lalu seruran merindang semua orang, ti endur pangka ari pengawa nya udah mai pengerusak ke menua enggau rayat iya di Sarawak.
 
Kejang deka bepilihbesai Ke-13 Malaysia, Radio Free Sarawak udah mansutka mayuh macham leman kes bekaul enggau opis Election Commission (EC) ti udah ditemu mindah-mindahka stesyen muai undi di Sarawak ari tumpuk pendiau orang ti semak ngagai sebengkah endur ti jauh sereta enda kala didinga sida! Jaku tangkan ke pengawa mindahka stesyen nya mega enda dipansutka ngagai bala pengundi, tang semina dipadahka EC ngagai sekeda pengundi BN aja.

Lalu dalam bulan Enam tu tadi, sebedau Najib dipelabaka mansutka jaku gerah pasal pengawa bepilihbesai, bala kroni BN bisi ditemu ngenataika diri ngagai rumah Taib Mahmud di Demak Jaya, bebinchingka beg ti berisi duit dikena nyuap bala pengundi – RM50 ngagai sapa-sapa pengundi ti ulih nunjukka sida udah ngundi BN! Lalu ke bendar mega, endang bisi dikereja pengawa ngulah peti undi, ngisi rintai nama pengundi ngena nama pelesu, jaku emba ngagai raban pengajar enggau orang ti kereja perintah enggau raban orang ti endang begunaka bantu ari opis perintah menua.

Raban pengereja pengawa ari opis EC bisi mega ditemu ngemulaka seraban pengundi ari sebengkah rumah panjai ti endur orang rumah panjai nya diasuh nurun muai undi muak ke ngalih hari aja, lalu sida dulu diasuh ngelantangka ati seraya ngirup arak ba muak ke pagi dulu ari nya.
 

Tang lebuh orang rumah panjai ti udah mabuk enggau ngelu pala nya datai ba palan muai undi muak ke lemai, sida nemu palan nya udah ditutup – laban palan muai undi nya endang dibuka muak ke pagi aja.
 
Taja pan baka nya, pengawa nyuap enggau penyalah nipu maya bepilihbesai nya empu endang dipeda nyadika siti ari sistem ti belaban reti enggau demokrasi ti didirika Taib dikena iya nentuka semina mimit aja pengundi ti ulih dikemataka iya, deka bulih peluang muai undi.
 
Penerang ari opis EC tau bendar ngasuh kitai tekenyit ti madahka pasal pengawa ngerejista bala pengundi baru di menua Sarawak. Angka rasmi ari EC nya madahka utai ti patut ditemu kitai pasal utai ti benung nyadi.
 
Diatu bisi semina 28% aja orang ti udah tau ngerejista di menua Sarawak dikemendarka ngundi!
Ke bendar iya, selampur sistem muai undi nya udah diulah dikena nentuka semina bala orang di menua pesisir aja enggau orang orang ti mimit tubuh tau ngundi.
 

Di menua pesisir ti endur mayuh agi tanah NCR ti kena keruga bala tukang tumbang kayu batang Taib enggau kompeni kebun sawit, perintah BN nadai bebendar bejalaika atur mantu ngaga kad pengelala, tauka ngerejista bala pengundi baru lalu pia mega ba mayuh kes bukai, perintah BN mega nadai mantu ngaga surat peranak ke nembiak mit ti baru ada.
 
Ambi ke banding, nitihka penerang ari gerempung NGO Mafrel (ti seruran nirika penemu minta pengawa ngundi nya beresi sereta dipejalaika enggau lurus) di menua Lawas ti endur datai ke 30,000 orang ti udah chukup umur ngundi, tang semina 6,000 iku aja pengundi ti berejista. Tang ba pengawa bepilihbesai ti dudi tu tadi, bala pengundi di menua Lawas udah nulak pengari BN lalu nirika pengari ari parti penyakal.

Di Batang Ai, Lubok Antu, ti endur besai bendar rampa tanah udah tengelam laban ai tekat hidro elektrik dia, lalu enggau rampa kandang menua ti besai bendar udah diambi kebun sawit SALCRA, ti nadai meri penguntung nama-nama ngagai orang di menua nya, tang udah mai pengeraja ngagai sida Sapit Kepala Menteri Alfred Jabu sebilik, bisi 22,000 iku orang ti udah chukup umur tau ngundi, tang ke diatu semina 8,000 iku aja bala pengundi ti berejista.
Lalu di pelilih menua Belaga, ari 23,000 iku orang dia, semina 7,000 iku aja nya pengundi ti berejista.
 
Tu meh utai ti dikumbai kitai pelilih menua bepilihbesai tauka kerusi buruk, ti endur Taib udah nentuka semina mimit aja bala orang diberi peluang nurun ngundi – iya nya bala orang ti ulih disuap perintah BN.

Udah pengelama 30 taun merintah dalam BN, Taib enggau raban menteri BN iya betegalka sida enda ulih ngusung bala pengundi, laban ‘menua sida nya kelalu jauh dilawa! Tang, ba BN, sida nadai tentu penanggul tama kampung puang ti jauh-jauh endur sida ngulihka kayu batang lalu muka kebun sawit.

Ke bendar iya Taib endang deka ngemesaika kandang rampa menua bepilihbesai di Sarawak, laban enti enda pia iya tentu deka lenyau kuasa atas bala pengundi. Tu, laban kejang deka bepilihbesai ke dulu suba, raban ari opis EC, ti endang patut bekereja enda setanah enggau sapa-sapa, tang sida endang dikuasa BN, udah nulak 90% peminta ngerejista pengundi baru di Sarawak lalu nadai mega meri tegal nama kebuah sida nulak peminta nya!

Pengawa minta ngerejista pengundi baru nya udah dikereja raban orang enggau bebendar ti deka mantu rayat menua pesisir ngenataika sada nyawa sida nengah peti undi. Tang Taib mega bebendar amat nentuka semua tuju enggau juluk ati nya enda ulih nyadi nyata.

Pegawa Taib ngaga garis entara menua ke sitak menua bepilihbesai (iya nya sebengkah pengawa nipu) mega dikereja ba beratus-ribu iku pengundi di kandang nengeri. BN udah mayuh bendar lenyau sukung ari bala pengundi rebak baru di kandang nengeri. Bala pengundi nya ulih ngaga kaul nengah internet lalu sida seruran meri enggau nerima penerang enggau berita ari pangan diri enggau naka penyampat, taja pan Taib udah bebendar amat nguasa media berita baka TV, radio enggau suratkabar.

Bala pengundi di nengeri baka di Kuching, Miri, Sibu enggau di nengeri ti bukai diatu udah belabuh leju enggau penyalah makai suap, pengerangka tuai-tuai dalam BN, pengusut rampa menua sereta enggau pengari perintah BN ti enda landik bekereja.
Nya alai, baka ni chara Taib deka ngiarka sida tu? Iya ngereja tu enggau chara meri seraban pengundi ti mayuh tubuh enggau kerusi ti mimit. Lalu, siti kerusi ba sitak nengeri ti bisi 30,000 pengundi, ti endur Taib ulih nyuap lalu ngemba raban pengundi ti mimit tubuh, iya nya raban orang 5,000 iku aja.

Taja pan BN udah nipu, nyuap bala pengundi sereta ngulah peti undi, parti-parti penyakal udah mujur bulih pemenang 41% undi. Tang laban mayuh agi bala pengundi sida tu ari kandang nengeri, dia sida semina bulih 21% ari semua kerusi, lalu enggau nya udah mujur nentuka Taib agi ulih bepagut ba kuasa iya dalam Dewan.
Ke bendar iya, sukung bala pengundi ti mayuh, lebih agi ba kandang nengeri, ti nyukung raban penyakal udah nyadika sebengkah situasyen ti tau ngasuh Taib remban, taja pan iya mujur bulih mayuh agi kerusi buruk ba kandang menua pesisir.

Tu meh kebuah, dictator tuai nya seruran berumban-rumban ngusung rumah tuan Gabenor, taja pan ba tengah malam ninting kali tembu pengawa ngundi, ngambika iya ulih jampat-jampat ngangkat sumpah nyadi kepala menteri sebedau raban pengundi di nengeri angkat nagang iya!

Diatu, ukai semina Sarawak Report aja ti ngemesaika pekara nipu tu ngagai serata dunya. Pengawa Taib ti nipu ninting kali bepilihbesai di Sarawak mega udah direpotka magazine The Economist ti endang besetuju enggau repot enggau serebana ti dikeluarka kami.

Taib udah ngemalu rayat iya empu ba mua komuniti dunya, lalu tu meh maya iya patut dibuai kitai lalu sama-sama ditumbakka begulai enggau parti BN ti udah kelalu rama sereta riri bekerugaka menua Sarawak enggau rayat iya?

Komen Blogger : Adakah kita masih harus biarkan Iblis bertopeng manusia terus berkuasa.  Bukankah menjadi tuntutan setiapa agama didunia ini untuk menentang kekejaman iblis dan syaitan. Ayuh..kita perangi iblis.